Eplekaka med vaniljekrem

Eplekaka er obligatorisk no når hausten og dei norske epla er komne. Om du skal laga kaka til mange, er langpanna heilt supert. Denne kaka er søt og god, men kesamen i vaniljeblandinga gjer den litt friskare, utan at det går ut over den tradisjonelle eplekakesmaken.
Kaka var eit lite eksperiment, så i oppskrifta nedanfor har eg skreve korleis eg vil laga den neste gong. Einaste forskjellen er at eplebåtane blir rulla i kanel og sukker før vaniljeblandinga kjem på, det gjor ikkje eg då eg laga akkurat den som er på bildet.

Til ei stor langpanna treng du:

• 500 g smør, romtemperert
• 500 g sukker (eg brukte 400 g kvitt + 100 g brunt)
• 8 egg
• 3 ts bakepulver
• 3 ts vaniljesukker
• 500 g kveitemjøl
• 6-8 epler
• 5 dl Piano vaniljekrem
• 1 dl vaniljekesam
• sukker
• kanel

Forvarm ovnen til 200°C. Pisk saman smør og sukker. Pisk så inn egga, eitt og eitt av gongen. Sikt bakepulver, vaniljesukker og mjøl og bland det inn i smørblandinga. Ikkje bland meir enn nødvendig for å få alt godt blanda. Fordel deigen jamt utover ei bakepapirkledt langpanna. 

Bland kanel og sukker, mengd etter smak. Skrell epla, del dei i båtar og vend dei i sukker- og kanelblandinga. Legg så epleskivene i eit fint mønster oppå deigen. Bland saman vaniljekrem og vaniljekesam, og ha det over epla i små klattar. Om du vil kan du smøra blandinga utover sånn at den blir jamt fordelt, men det er ikkje nødvendig. Strø over litt meir kanel og sukker (men ikkje mykje).
Steik kaka midt i ovnen i 40-50 minuttar. Sjekk med kakenål at kaka er gjennomsteikt. La kaka avkjøla i forma. Server med vaniljeis og nyyyyt!