Tunfiskpita

Dette er noko eg åt mykje til kvelds då eg var student i Bergen. Tunfiskpita er veldig enkelt og tek så lang tid å laga som den tida det tek å varma pitabrødet. Dessutan er det sunt og godt. Eg brukar helst grovt pitabrød om eg får tak i det.
Denne oppskrifta kan lett varierast ved å bruka forskjellige typar grønsaker og krydder, men eg likar denne versjonen best.

1 stor eller 2 små porsjonar:

• 1-2 pitabrød
• 1/3 beger Cottage cheese
• 80 g (2-3 ss) tunfisk i vatn
• ca 3 cm agurk
• salt
• pepar
• timian eller basilikum (helst fersk, men tørka går òg fint)

Varm pitabrødet etter anvisning på pakken. Hakk agurken i fine bitar. Bland cottage cheese, tunfisk, agurk, salt, pepar og krydder i ein bolle. Når pitabrødet er ferdig har du fyllet i. Så er det berre til å nyta ein betre lunsj eller kvelds.