Bakt potet

Etter ein lang og fin fjelltur på søndag hadde eg og min kjære bakt potet til kvelds. Dette er noko som garantert alle klarar å få til, sidan det ikkje er noko komplisert i det heile. eg har ikkje bilde denne gongen, sidan eg heilt gløymte å ta bilde på søndag. Dessutan veit vel alle korleis ei potet ser ut.

Du treng:

• 1 potet pr person
• aluminiumsfolie

Finn nokon megastore poteter på butikkken, eller kjøp bakepoteter. Bakepoteter er det mange, litt større butikkar som har i grønsakshylla.

Set steikeovnen på 200°C. Når den er varm nok legg du potetene på ei rist midt i ovnen eller på ein grill. Steiketida kjem litt ann på størrelsen på potetene, men du må rekna minst 1 time og 15 minuttar, mest sannsynleg litt lenger. Kjenn på potetene, dei skal vera litt mjuke. Og så vil eg sei det er betre å baka dei litt for lenge, enn litt for lite.

Når det gjeld fyllet i poteta er det berre fantasien som set grenser. Det som er så fint er at alle kan ha i akkurat det dei sjølv vil, så alle blir fornøgde. Mine tips er:

• kryddersmør
• kremost (kvitlauk/krydder/urter)
• skinka (kylling eller svin)
• ost
• rømme
• paprika
• bacon
• løk
• mais
• bønner
• dressing

Så er det berre å fylla poteta så godt ein klarar, og nyta maten. Nam nam!

Potetsalat

Då me vart inviterte til frokost på 17. mai fant eg ut eg måtte ha med noko så ikkje vertskapet vart nødt til å stå for all maten sjølv. Valget var ikkje så vanskeleg. Potetsalat eignar seg jo i dei fleste settingar no når det er tid for både spekemat og grillmat, og så er det jo noko som mange (dei alle fleste?) likar. Så i dag har eg stått på kjøkkenet å skrelt og kutta poteter som berre det. 

8 porsjonar:

• ca. 2 kg poteter
• 3dl kesam
• 3 pk lettmajones (3 x165 g)
• 6 ss sitronsaft
• 1,5 ts salt
• 1,5 ts pepar
• 6 ts sukker
• 3/4 hakka purre

Kok, skrell og avkjøl potetene. Del dei så i passande bitar. Bland kesam, lettmajones og sukker. Smak til med salt, pepar og sitronsaft. Skjær purren i ringar. Vend så alle ingrediensane saman og la potetsalaten stå ei stund for å få smak. 

Oppskrifta er lånt frå Matprat, men eg kutta ut epler sidan eg ikkje synst noko om sånt i potetsalat. Trippla dessutan oppskrifta sidan det skulle rekka til mange.

Oppdatering 21.05.13: Eg lot min stå i kjøleskap over natta for å godgjera seg, og la dressingen trekkja inn i potetene. Om du ikkje har tid til å la potetsalaten kvila, anbefalar eg å koka meir poteter eller kutta litt ned på kesam og majones, ellers blir potetsalaten litt for rennande synst eg. Forøvrig kan eg fortelja at omtrent all potetsalaten vart eten, så den var ein skikkelig suksess ;)