Baconsurra indrefilet av svin med mojosaus

Då var det endeleg tid for ny oppskrift her! Har ikkje vore store aktiviteten her inne den siste 1,5 mnd, men eg har ikkje gløymt bloggen. Hadde f.eks planar om ei ny muffins-oppskrift til 17. mai, men kom i tidsklemma, så det blei berre laga den same potetsalaten som i fjor. I dag fekk me middagsgjest her i hus, og sidan eg har hatt fri heile dagen tok eg lika greit å diska opp med noko skikkeleg lekkert, nemleg baconsurra indrefilet med mojosaus (soppsaus for den som ikkje likar sterkt), potetbåtar og salat. Soppsausen blei frå Toro denne gongen sidan dei blei meir enn nok å laga til, men eg hadde i litt sopp som var steik i same steikepanna som indrefileten, for å gi sausen litt meir smak.

Nok til 3 personar:

• Indrefilet av svin (ca 400 g)
• Nok bacon til å dekkja indrefileten
• 10 store poteter
• Olivenolja
• Krydder

Forvarm steikeovnen til 220°C. Vask potetene og del dei på langs. Ha dei i ein bolle saman med olivenolja og krydder. Bland saman. Legg potetbåtane med skinnsida ned på steikebrett. Sett midt i ovnen. Potetbåtane skal stå i 30-40 minuttar.

Rull bacon rund indrefileten sånn at det dekkjer den heilt. Brun inderfileten i ei varm steikepanna til baconet er gyllent over det heila. Sett eit steiketermometer i indrefileten og legg den i steikeovnen saman med potetbåtane. Steik til kjernetemperaturen er 75°C. Poteter og filet bør vera ferdig samtidig om det blir gjort i denne rekkjefølgja. Husk at indrefileten må kvila 10 minuttar før du skjer i den. 

Mild raud mojosaus:

• 1 fedd kvittlauk
• 1 heil raud chili 
• 0.5 raud paprika (bytt denne ut med ein til chili om du vil ha sterkare saus)
• 1 ts spisskummin
• 1 ts paprikapulver
• 3-4 ss eddik
• 1.5-2 dl olivenolja
• salt

Ha alle ingerdiensane (utanom salt) i ein liten hurtikmiksar og la den gå ei stund. Smak så til med salt. Om du synst sausen blir for tjukk eller sterk vispar du inn litt vatn. Sett sausen i kjøleskap om det er ei stund til den skal serverast.

Salat:

• Isbergsalat
• Ruccola
• Raspa gulrot
• Paprika
• Agurk
• Avocado
• 1 glas fetaost

Lag salaten medan indrefileten kviler seg, og så er det berre til å nyta eit betre måltid :)

Potet- og gulrotgrateng med karbonadedeig

Av og til får eg for meg å bla i ein av dei mange kokebøkene eg har i søken etter inspirasjon. Denne retten er inspirert av ei oppskrift eg fant i boka "Frå bollar til burritos". Alle som har hatt heimkunnskap på grunnskulen huskar vel denne? Eg har bladd gjennom denne nokon gonger, og det er i grunn mykje godt i enkelt å finna her, så eg skal prøva å bruka denne (og dei andre) litt meir. Dette er ein litt sånn ta-det-du-har-grateng eigentleg. F.eks kom eg på då eg var nesten ferdig med å laga til i den eldfaste forma at eg hadde ein liten slump med frossne erter i frysen, så då vart dei med. Så ta det du har og lag i veg, og server gjerne med salat og godt brød. Men berre hvis du har altså ;)

4 porsjonar:

• 4-5 poteter, strimla
• 4 gulrøtter, strimla
• 1 løk, hakka
• 400 g karbonadedeig
• 2 dl kvitost, riven
• salt
• pepar
• timian (kan bytast ut med anna krydder)
• 2 dl lettmjølk
• 1 dl fløyte
• ca 1 dl frossne erter

Forvarm steikeovnen til 225°C. Vask, reins og del potet, gulrøtter og løk. Gni ut karbonadedeigen sånn at han blir kornete. Legg så poteter, løk, gulrøtter, karbonadedeig og ost lagvis i ei eldfast form saman med salt og krydder. Slå mjølk og fløyte over. Dryss over ertene til slutt. Steik så gratengen i ovnen i ca 45 minuttar, til potetene og gulrøttene er møre. 

Steikte potetbåtar

Dagens middag vart nakkekotelettar med kokte grønsaker, ostesaus og sjølvsagt steikte potetbåtar. Steikte potetbåtar er veldig enkelt å laga og veldig godt. Eg prøvde meg på ei blanding av søtpoteter, som eg aldri har smakt før, og vanlege poteter. Smaken på søtpotetene var god (smakte litt som baconcrisp i grunn), men dei blei nok litt for mjuke i forhold til dei vanlege potetene. Steikte potetbåtar passar til det aller mesta, og smaken kan ein lett variera med bruk av forskjellig krydder. Mengda poteter ein brukar vurderar ein sjølv etter kor mange det er som skal ha, og kor mykje ein antek at kvar og ein et. Ein peikepinn kan vera at ein treng 10 poteter til 4 personar.

• poteter
• matolja
• salt og pepar
• krydder

Forvarm steikeovnen til 225°C. Vask potetene godt og del dei i båtar. Legg desse i ei langpanna me aluminiumsfolie/bakepapir i botnen. Hell over matolja og dryss på krydder. Vend potetbåtane sånn at alle blir heilt dekka av olja og krydder. Steik midt i ovnen i 20 minuttar. Dei siste 5 minuttane set du på varmluft for å få ekstra sprø potetbåtar. Simple as that ;)

Bakt potet

Etter ein lang og fin fjelltur på søndag hadde eg og min kjære bakt potet til kvelds. Dette er noko som garantert alle klarar å få til, sidan det ikkje er noko komplisert i det heile. eg har ikkje bilde denne gongen, sidan eg heilt gløymte å ta bilde på søndag. Dessutan veit vel alle korleis ei potet ser ut.

Du treng:

• 1 potet pr person
• aluminiumsfolie

Finn nokon megastore poteter på butikkken, eller kjøp bakepoteter. Bakepoteter er det mange, litt større butikkar som har i grønsakshylla.

Set steikeovnen på 200°C. Når den er varm nok legg du potetene på ei rist midt i ovnen eller på ein grill. Steiketida kjem litt ann på størrelsen på potetene, men du må rekna minst 1 time og 15 minuttar, mest sannsynleg litt lenger. Kjenn på potetene, dei skal vera litt mjuke. Og så vil eg sei det er betre å baka dei litt for lenge, enn litt for lite.

Når det gjeld fyllet i poteta er det berre fantasien som set grenser. Det som er så fint er at alle kan ha i akkurat det dei sjølv vil, så alle blir fornøgde. Mine tips er:

• kryddersmør
• kremost (kvitlauk/krydder/urter)
• skinka (kylling eller svin)
• ost
• rømme
• paprika
• bacon
• løk
• mais
• bønner
• dressing

Så er det berre å fylla poteta så godt ein klarar, og nyta maten. Nam nam!