Ripsmuffins med kvit sjokoladeganach

Idèen til denne oppskrifta fekk eg då eg stod med hovudet inni ripsbusken og plukka rips. Rips er jo som de veit syrleg, og kvit sjokolade kan vera kvalmande søt om den blir eten åleina, så då vil jo desse jamna kvarandre ut, tenkte eg. I denne muffinsen er det kvit sjokoalde både inni og som sjokoladeganach på toppen.

Til 16 muffins treng du:

• 2 egg
• 2 dl sukker
• 100g smør
• 4 dl kveitemjøl
• 2 ts bakepulver
• 1 ts vaniljesukker
• 1,5 dl mjølk
• rips
• 100 g kvit sjokolade

Sett steikeovnen på 180°C. Smelt margarin og la det avkjøla litt. I mellomtida piskar du egg og sukker til eggedosis. Bland alle dei tørre ingrediensane, og tilsett desse vekselvis med mjølk og smelta smør. Hakk opp sjokoladen og vend den inn i røra for hand. Fyll opp muffinsformene 2/3. Strø så over rips, så mykje som du vil ha og dytt dei litt ned i røra. Det er ein fordel om du har eit muffinsbrett, då er du garantert at muffinsane ikkje vil flyta utover. Hvis du ikkje har det er det lurt å bruka to former til kvar muffins. Steik i ca. 20 minuttar.

Kvit sjokolade ganach:

• 100 g kvit sjokolade
• 1/2 dl fløyte
• 1 ss smør

Kok opp fløyten og ta den av plata. Knekk opp sjokoladen i bitar og rør den inn i fløyten. Rør så inn romtemperert smør. La den stå til den har fått romtemperatur. Ha den så i kjøleskapet i ca 30 minuttar. På mine muffins tok eg å pensla ganachen på, sidan eg synst det blei så grisete å bruka sprøytepose. Her er det smak og behag som avgjer korleis deu gjer det, men spørytar du på må du nesten rekna med å laga dobbel prosjon med ganach. Uansett så endar du opp med ein god og litt annerledes muffins.