Krema gryta med pasta og bønner

Denne gryta laga eg sist helg då kjærasten var til Dyrsku ein tur. Han er ikkje så begeistra for bønner, så må ein nytta på å laga middag med det i når han ikkje er heima. gryta er krema, men og litt spicy på grunn av curry pasten eg hadde i. Om du ikkje har det går det fint ann å bruka chili eller chilipulver. Då må ein nok ha i litt meir enn det eg har gjort her. Om du ikkje vil ha den spicy kan du utelata det heilt. Som de ser er denne heilt utan kjøtt, og med bønner i saknar ein det i grunn ikkje heller, sjølv om nokon vil vera ueineg i det :P

3-4 porsjonar:

• 1 boks kidneybønner (ca 400 g)
• 4 ss rapsolja
• 2 store lauk, finhakka
• 3 fedd kvitlauk, finhakka
• 1 boks hakka tomat
• 2 ts oregano
• 1 ts tomatpure
• 0.5 ts red curry paste (kan sløyfast)
• 8 dl vatn
• 100 g makaroni
• 100 g soltørka tomat i olja, oppdelt
• 5-6 cherrytomater (kan sløyfast)
• 4 ss lettrømme
• salt og pepar

Varm olja i ei gryta på middels varme. Surr lauk og kvitlauk nokre minuttar til lauken er blitt blank og mjuk. Rør inn tomaert, oregano, tomatpure og red curry paste. Tilsett vatn og kok opp. Skyll bønnene og ha dei i gryta. Så har du i makaroni og dei soltørka tomatene. Kok på middels varme til makaronien er ferdig. Ha så i lettrømme og rør god sånn alt blandar seg. Kok 1 minutt til og så er middagen ferdig

Brennsnute med kjøttpølsa

Dette er vel litt på kanten av kva ein kan kalla ei oppskrift, men ei godt tips til middag er det i alle fall. Dette er middagen for dei dagane du har lyst på noko godt og heimalaga, men rett og slett ikkje har tid eller ork til å laga noko frå botnen av. Og ja, det er så absolutt lov å bruka posemat, eg skal ikkje arrestera nokon for det ;)

Til 4 prosjonar treng du:

• 1 pakke kjøttpølsa
• 1 pose ertesuppa
• 1 pakke frossen lapskausblanding
• 1/2 pakke frossne erter
• salt og pepar

Lag ertesuppa etteranvisning på pakken. Kok opp og lat det koka i ca 10 minuttar. Ha i lapskausblandninga og ertene. Del kjøttpølsa og ha den. La det heile surra på medium varme i minst 5 minuttar, men den kan godt stå lenger. Smak til med salt og pepar. Så enkelt var det!

Miniostekaker med bær

Desse ostekakene har ein søt smak av bringebær saman med den litt syrlege smaken av skogsbær. Dessutan er dei veldig enkle å laga og tek mykje mindre tid enn ei stor ostekaka.

Gir ca 8 miniostekaker:

• 9 Ballerina Jordbærkyss
• 45 g smør
• 300 g kremost
• 1 ss kveitemjøl
• 90 g melis
• 1 ts bringebæressens (kan utelatast eller byttast ut med vanilje-eller mandelessens)
• 1 egg
• 3 ss rømme
• raud konditorfarge (kan utelatast)
• frossne skogsbær

Forvarm steikeovnen til 180°C. Knus kjeksene anten i ein miksar eller ha dei i ein brødpose og slå dei til smular med ein kjevle. Smelt smør og bland det med kjekssmulane. Fordel kjeksblandinga i muffinsformer og press den litt ned. Her er det ein fordel om du har eit muffinsbrett. Om du ikkje har det bruk dobbelt med muffinsformer. 

Bland saman kremost, mjøl, melis, bringebæressens, egg, rømme og eventuelt konditorfarge. Bland alt til det har blitt lett og luftig. Ha skogsbær i muffinsformene før du heller kremostblandinga over sånn at det dekkjer bæra heilt. 

Steik ostekakene i 15-20 minuttar til dei har blitt faste. Lat ostekakene avkjøla heilt i brettet før du har dei i kjøleskapet ei lita stund.

Så er det berre å nyta!

Gulrotsuppa

Kva gjer ein når ein har alt for mykje gulrøtter i kjøleskapet? Jo, ein lagar gulrotsuppa såklart! Og det var akkuart det eg gjor i dag. Oppskrifta fant og på matpart.no, men endra ho litt etter min eigen smak.

4 porsjonar:

• 1,5 kg gulrøtter
• 400 g poteter
• 1 løk
• 0.5 chili
• 1,5 l buljong
• 0.5 purre
• salt
• pepar
• oregano (eller anna krydder)
• mager kesam

Skrell potetene og gulrøttene. Skjær potetene i store terningar og 2/3 av gulrøttene i grove bitar. Rens løken og del den i skiver. Surr løken i ei gryta til den blir blank. Ha grønsakene over i panna saman med løken. Fres alt nokon minuttar. Skjær chilien i skiver og ha den i gryta saman med oregano. Hell på buljong og la det koka i 10-15 minuttar til grønsakene er møre. Skjær i mellomtida resten av gulrøttene og purren i tynne skiver. Kjør Suppa glatt med ein stavmiksar. Kok opp suppa. Om den blir litt for tjukk har du i meir vatn. Pass på, suppa kan spruta rundt seg ganske kraftig. La det småkoka i 5 minuttar. Smak til med salt og pepar. Server med ein klatt kesam, eit dryss av oregano og godt brød. Om du har friske urter bruk dei til pynt.

Du kan gjerne tilsteja svinekjøtt eller kyllingfiilet i strimlar om du vil ha kjøtt i suppa. Steik dette då ved sidan av og la kvar og ein bestemma sjølv.

Go' kako

Denne kaka er den så absolutte favoritten i min familie. For å sei det sånn: Når kaker og kaffi blir servert spurtar (nesten) samtlege av mine søstre og søskenbarn mot kakebordet for å få eit passeleg stort stykke av denne kaka, og den blir alltid eten opp. Det er alltid bestemor som lagar kaka til selskap, men denne gongen var kaka til ein dåp i min kjæres familie, så då fekk eg prøvd meg på kaka sjølv. Og ut i frå biletet nederst vil eg sei at kaka var ein suksess :)
Trur kanskje denne kaka går under namnet "Ripskaka" eller noko i den dur, men eg har aldri kalla den noko anna enn "Go' kako", og det vil eg fortsetja med så lenge eg lev trur eg.

Til ei 24 cm rundform treng du:
Botn:

• 5 eggekvitar
• 188 g melis
• 188 g mandlar

Forvarm ovnen til 170°C. Dekk botnen på kakeforma med bakepapir og smør kantane med smør elller formfeitt. Finhakk mandlane og bland dei med melisen. Rør eggekvitane stive. Dei er ferdig når du kan halda bollen opp-ned utan at noko kjem ut. Vend eggekviten forsiktig inn i mandelmassen. Fortsett heilt til du har ei jamn blanding. Pass på så du ikkje rører lufta ut av eggekviten når du vender den inn. Steik botnen nederste i ovnen i ca 45 minuttar. 

Når botnen er ferdig tek du den ut og let den avkjøla heilt. Lat den stå i forma, men  du kan godt løsna litt på ringen så du veit at botnen ikkje heng fast i sidene. Boten kan  med fordel lagast god tid i forvegen og frysast ned. Fyll og pynt bør ein helst venta med til den dagen kaka skal serverast

Fyll og pynt:

• 2 bananer
• 200 g raspa mørk sjokolade (150 g til fyll + 50 g til pynt)
• krem (3 dl kremfløyte + 2 ss sukker)
• rips

Bre eit tynt lag med  krem på botnen. Skjær så bananene i passeleg tjukke skiver  og dekk heile botnen. Rasp så over mesteparten av sjokoladen. Eg brukar hakketilbehøret på stavmiksaren min til sjokoladen. Ha resten av kremen over. Bruk gjerne ein sprøytepose for å få eit fint resultat. Strø over resten av sjokoladen. Til denne kaka skal det vera rips, og då har ein 3 alternativ til korleis ein vil gjera det:

1. Strø rips over sjølve kaka
2. Ha rips rundt heile kaka på kakefatet
3. Server rips ei skål ved sidan av

Alternativ 1 og 2 passa best om du har fersk ripa, medan alternativ 3 er best om ripsen har vore frosen. Uansett så blir denne kaka nam nam!

Det som var igjen av kaka då dåpen var over :)