Bananmuffins med sjokolade og kanel

Kombinasjonen banan, sjokolade og kanel er min desiderte favoritt (etter berre sjokolade sjølvsagt), så desse hadde eg stor tru på då eg begynnte bakinga. Og eg vart ikkje skuffa dei lukta himmelsk og smakte det same. Har igjen lånt oppskrifta frå nokon (som eg sjølvsagt gløymde å skriva ned), men eg endra litt på oppskrifta ved å minska sukkermengda. Det er rett og slett ikkje nødvendig med så mykje sukker når ein har bananer i. Det einaste ein då må passa på er at ein tek av litt av eggekviten òg.

18-20 muffins:

• 3 egg (minus litt eggekvite)
• 80 g sukker
• 2 ts vaniljesukker
• 200 g kveitemjøl
• 100 g sammalt kveitemjøl
• 3 ts bakepulver
• 2-3 ts kanel
• 175 g smør/margarin (eg brukar margarin)
• 3 modne bananer
• 100 g mørk sjokolade (eller anna sjokolade, om du foreterkk noko anna)

Begynn med å setja steikeovnen på 200°C. Pisk egg, sukker og vaniljesukker kvitt og luftig. Bland saman mjøl, bakepulver og kanel og ha det i bakebollen. Smelt så smøret på låg varme. Medan smøret kjøler seg litt ned mosar du bananene. Bland så smør og bananer, før du har det i resten av røra. Hakk opp sjokoladen i så små eller store bitar du vil og vend dei inn i muffinsrøra for hand. Fordel røra i muffinsformer, ca 2/3 fulle.  For å få dei høge og fine er det ein fordel å bruka muffinsbrett. Det gjer eg. 

Steik i 15-20 minuttar, til det er lett gyldne. Her hos meg var 15 minuttar nok, men det er forskjellig får ovn til ovn.

Om du ikkje vil eta alle muffinsane med ein gong, går det godt ann å frysa dei. Tin dei då i steikneovnen på 160-180°C i 10-15 minuttar. Men mi erfaring er at dei går så fort at det ikkje er noko vits i å frysa dei. Min kjære fortærte åleina nesten halvparten på 2 dagar ;)